Ermənistan daxilində narahatlıq: Azərbaycan Paşinyanın reytinqini artırır!

Erməni şərhçi Arman Abovyan hesab edir ki, Azərbaycan tərəfinin sülhlə bağlı atdığı addımlar Ermənistanın Baş naziri Nikol Paşinyanın reytinqini yüksəldir və bunun seçkidə hakimiyyət üçün müsbət nəticələri olacaq. Onun fikrincə, seçkidən sonra azərbaycanlıların geri qayıdışına start verilə bilər: "Qərbi Azərbaycan konsepsiyasının reallaşması istiqamətində addımlar atıla bilər. Ermənistanda "dördüncü respublika"nın elan edilməsi də bu prosesin tərkib hissəsidir". 

Məsələni TodayPress TV-yə şərh edən Ədalət, Hüquq, Demokratiya Partiyasının (ƏHD) ictimai-siyasi əlaqələr üzrə katibi, politoloq Azər Qasımov bildirib ki, Ermənistanın siyasi və ictimai arenasında seçkilərlə əlaqəli yaranmış gərginlik fonunda Azərbaycanın atdığı addımlarla bağlı Paşinyanın reytinqinin artması fikri həqiqətə uyğundur.

Hətta Azərbaycanın bunu məqsədli şəkildə etdiyi də sirr deyil, çünki Azərbaycan Paşinyanın hakimiyyətdə qalmasında maraqlıdır:

“Azərbaycan Nikol Paşinyan kimi düşünən siyasətçilərlə işləməkdə maraqlıdır. Qərbi Azərbaycan konsepsiyası isə həmişə Azərbaycanın gündəmində olub və bundan sonra da olacaq. Azərbaycanlıların Qərbi Azərbaycana qayıtmasında qeyri-adi heç nə yoxdur. Onlar ata-baba yurdlarına qayıtmalıdırlar".

Politoloq vurğulayıb ki, Qərbi Azərbaycan tarixi Azərbaycan əraziləridir. Ermənistan istəsə də, istəməsə də, ordan qovulmuş azərbaycanlılar torpaqlarına qayıtmalıdır. 

Qiymət Mahir

TodayPress TV