Meksikalı nazir: Mexikonun tarixi mərkəzinin bərpası prioritetdir
“700 illik tarixə malik Mexiko şəhərinin tarixi mərkəzinin yenidən canlandırılması şəhərin əsas prioritetlərindən biri hesab olunur”.
TodayPress TV xəbər verir ki, bunu WUF13 çərçivəsində keçirilən “Mədəni irsə yeni baxış və inklüziv şəhər yenilənməsi” adlı xüsusi sessiyada çıxışı zamanı Meksika şəhərinin mənzil naziri İnti Munoz deyib.
O qeyd edib ki, Mexiko şəhərinin tarixi mərkəzi qədim asteklərin Tenoçtitlan şəhərinin təməli üzərində formalaşıb və burada müxtəlif dövrlərin izləri qorunub saxlanılır:
“Bu ərazidə müstəmləkə dövrünün şəhər planı, XX əsr memarlığı və müasir memarlıq üslubları bir arada mövcuddur. Tarixi mərkəz bu gün də olduqca canlı ərazi olaraq qalır və hər gün təxminən 1,5 milyon ziyarətçi qəbul edir. XIX əsrin sonlarında bütün Mexiko şəhəri əsasən bu ərazidə yerləşirdi və burada 300 minə yaxın insan yaşayırdı. Hazırda isə tarixi mərkəzdə cəmi 30 min sakin qalıb”.
Nazir vurğulayıb ki, tarixi mərkəzin yenidən məskunlaşdırılması şəhərin yenilənmə gündəliyində əsas yer tutur:
“Bir dövr biz düşünürdük ki, tarixi mərkəz tamamilə itirilib. Çünki XX əsrin sonlarında bu ərazi tərk edilmiş və əhalisini itirmişdi. Meksikada demokratiyanın inkişafı ilə birlikdə tarixi mərkəzin bərpası şəhərin ictimai siyasətində əsas prioritetlərdən birinə çevrilib.
İ.Munoz əlavə edib ki, son 30 ildə davamlı şəkildə həyata keçirilən siyasət nəticəsində artıq tarixi mərkəzin yenilənməsi üzrə xüsusi model formalaşıb.
Qiymət Mahir
