Azərbaycan üçün örnək platforma: İkinci onillikdə şəhərsalma proqramları sürətləndiriləcək

“Biz bu tədbirin təşkilinə dəstək verən və burada çalışan bütün insanları hesablasaq və bura daxil etsək, iştirakçıların sayı 50 mindən çox olacaq. Prezident İlham Əliyevin uzaqgörən liderliyini, eləcə də UN-Habitat-ın və İcraçı Direktor Anaklaudia Rossbaxın mühüm platformanın yaradılmasındakı səylərini yüksək qiymətləndiririk”.

TodayPress TV  xəbər verir ki, bunu Bakıda keçirilən Dünya Şəhərsalma Forumunun 13-cü sessiyası (WUF13) çərçivəsində təşkil olunan Yeni Şəhər Gündəliyi üzrə Nazirlər Toplantısının bağlanış seqmentində Dövlət Şəhərsalma və Arxitektura Komitəsinin sədri Anar Quliyev deyib.

Komitə sədri çıxışında 182 ölkədən minlərlə qeydiyyatdan keçmiş iştirakçının olduğunu xatırladaraq, görüşün qlobal əməkdaşlıq baxımından böyük əhəmiyyət kəsb etdiyini diqqətə çatdırıb. O, hazırkı dövrün şəhərsalma siyasəti üçün bir dönüş nöqtəsi olduğunu vurğulayıb:

“Bugünkü görüş mühüm bir məqamda baş tutdu. 2026-cı il Yeni Şəhər Gündəliyinin (New Urban Agenda) 20 illik icra üfüqünün tam orta nöqtəsini qeyd edir. Kitoda Birləşmiş Millətlər Təşkilatının Mənzil Təminatı və Dayanıqlı Şəhərsalma üzrə Konfransında qəbul edilməsindən 10 il sonra, Yeni Şəhər Gündəliyi layiqli mənzil təminatının, eləcə də inklüziv, təhlükəsiz, dözümlü və davamlı şəhərlərin və yaşayış məskənlərinin inkişaf etdirilməsi üçün həyati əhəmiyyətli bir çərçivə olaraq qalmaqdadır”.

Gələcək hədəflərə və qlobal şəhərsalma proqramlarının icra tempinə toxunan Anar Quliyev bəyanatını bu çağırışla tamamlayıb:

“Bugünkü müzakirələr aydın şəkildə göstərdi ki, icranın növbəti onilliyi sürətləndirilmiş icra, daha güclü tərəfdaşlıqlar və ölçülə bilən tərəqqi onilliyi olmalıdır”.

Qiymət Mahir