Səmada ŞOK hadisə! Partlayış səsi eşidildi

ABŞ-nin Ohayo ştatı üzərində təxminən yeddi ton ağırlığında böyük bir meteor Yer atmosferinə daxil olub.

TodayPress TV xəbər verir ki, bu barədə "AP News" məlumat yayıb.

Kosmik obyekt saatda təxminən 72.000 kilometr sürətlə hərəkət edərək atmosferdə parçalanıb və güclü partlayışa səbəb olub. Bir çox sakin hadisəni partlayışla səhv salıb.

Meteor ilk dəfə Eri gölü üzərində 80 kilometr yüksəklikdə müşahidə edilib. Onun diametri təxminən 1,8 metr olub və atmosferin yuxarı təbəqələrindən 55 kilometr qət edərək şimali Ohayo üzərində parçalanıb. Parlaq alov topu Viskonsindən Merilendə qədər bir neçə ştatda görünüb.

Amerika Meteor Cəmiyyətinin məlumatına görə, meteor səhər saat 9 radələrində çılpaq gözlə görünəcək dərəcədə parlaq olub ki, bu da nadir hal sayılır. Parçalanma nəticəsində təxminən 250 ton TNT-yə bərabər enerji yayılıb. Bölgə sakinləri yüksək səs eşidib, Milli Hava Xidmətinin əməkdaşları isə titrəmələr hiss ediblər.

Türkan İsgəndərli

TodayPress TV