Papadan TƏKLİF: Növbəti Rusiya-Ukrayna görüşü Vatikanda ola bilər

Papa XIV Leo Vatikanı Rusiya və Ukrayna arasındakı danışıqlar üçün yeni məkan kimi təklif edib.

TodayPress TV “La Stampa”ya istinadən xəbər verir ki, bunu Vatikanın dövlət katibi kardinal Pietro Parolin Avqustinyanumda keçirilən görüşdə deyib.

"Biz ümid edirdik ki, münaqişənin sülh yolu ilə həlli istiqamətində ləng, lakin müsbət proses başlaya bilər. Biz yenə də yolun başlanğıcındayıq" kardinal bildirib.

Parolin əlavə edib ki, hazırkı vəziyyət son dərəcə ağırdır. Papa XIV Leo tərəfindən təklif olunan vasitəçilikdən danışan kardinal qeyd edib ki, pontifik Vatikanın iki tərəf arasında birbaşa görüş imkanı yaradacağını nəzərdə tutub.

Parolin vurğulayıb ki, tək məqsəd hər iki tərəfin bir-biri ilə danışmasıdır.

Töhfə Səməd