Rusiyalı qastroenteroloq: "Bananı yeməzdən əvvəl mütləq yuyun"
Bananları yeməzdən əvvəl yumaq niyə vacibdir?
TodayPress TV xəbər verir ki, bu barədə rusiyalı qastroenteroloq Olqa Çistik "Lenta.ru" nəşrinə müsahibəsində danışıb.
Həkimin sözlərinə görə, bananların mağazalara zədələnmədən və kal (yaşıl) halda çatdırılması üçün onlar fungisid və pestisidlərlə - göbələk və həşəratlara qarşı kimyəvi maddələrlə emal olunur. Bu maddələrin bir hissəsi isə meyvənin qabığında qalır:
"Bananın qabığına bağırsaq çöpü, salmonella, listeriya və bəzən də parazit yumurtaları çökə bilər. İnsan meyvəni əlinə alıb soymağa başladıqda, bütün bu mikroblar barmaqlara, bıçağa və oradan da meyvənin özünə (lətinə) keçir. Daha sonra isə mikroorqanizmlər maneəsiz şəkildə ağıza daxil olur", - deyə Olqa Çistik xəbərdarlıq edib.
O qeyd edib ki, sağlam immunitetə malik insanda çirkli banan yemək adətən hər hansı ciddi fəsad törətmir. Lakin uşaqlar, hamilə qadınlar və yaşlı şəxslərdə bu, kəskin qastroenterit xəstəliyinə yol aça bilər.
Həkimin bildirdiyinə görə, çirkli banan yemək ürəkbulanma, qusma, ishal, qarın sancıları və qızdırma ilə müşayiət olunan qida infeksiyalarına, eləcə də zəhərlənmələrə səbəb ola bilər. Uşaqlar və yaşlılarda isə bu fonda sürətlə susuzlaşma yarana bilir.
Bununla əlaqədar olaraq, Olqa Çistik bananları yeməzdən əvvəl 20-30 saniyə ərzində soyuq axar suyun altında yumağı məsləhət görüb. Lazım gələrsə, qabığı - xüsusən də gövdə ətrafını və tünd ləkələr olan hissələri yumşaq fırça və ya süngərlə təmizləmək olar. Yuyarkən sabundan istifadə etməyə ehtiyac yoxdur, çünki sabun qalıqları qabığın məsamələrində qala bilər.