Qırmızı ət iranlı qadınları depressiyaya saldı
Tehran Tibb Elmləri Universitetinin alimləri yüksək heyvan zülalı istehlakının qadınlarda depressiya, narahatlıq və stress simptomları riskinin artması ilə əlaqəli olduğunu müəyyən ediblər.
TodayPress TV xəbər verir ki, bu barədə "Gazeta.ru"da məqalə dərc olunub.
Tədqiqatda İrandan olan 489 qadın iştirak edib. Alimlər könüllülərin pəhrizindəki heyvan və bitki zülalının miqdarını müqayisə edib və bunun onların psixo-emosional vəziyyətinə təsirini qiymətləndiriblər.
Qadınlar pəhriz anketlərini və depressiya, narahatlıq və stress simptomlarını müəyyən edən standart DASS-21 testini doldurublar. Daha sonra tədqiqatçılar yaş, sağlam olmayan vərdişlər və genetik meyl də daxil olmaqla nəticələrə təsir edə biləcək digər amilləri də nəzərə alıblar.
Təhlil göstərib ki, rasionlarında ən çox heyvan zülalı olan iştirakçıların hər üç simptomu bildirmə ehtimalı xeyli yüksəkdir. Bu qrupdakı qadınların depressiya əlamətlərini qeyd etmə ehtimalı heyvan zülalını daha az istehlak edənlərlə müqayisədə 2,6 dəfə, narahatlıq əlamətlərini bildirmə ehtimalı 1,8 dəfə, stress simptomlarını isə 3,7 dəfə çox olub.
Buna baxmayaraq, bitki zülalı tədqiq edilən zehni sağlamlıq nəticələri ilə statistik olaraq əlaqələndirilməyib. Tədqiqatçılar bu fərqi amin turşularının tərkibi, əlaqəli yağlar və ümumi pəhriz xüsusiyyətlərindəki fərqlərlə izah etməyə çalışırlar.
Müəlliflər qeyd edirlər ki, tədqiqat birbaşa səbəb-nəticə əlaqəsini sübut etmir. Lakin tapıntılar zülal qəbulunun zehni sağlamlıqda mümkün rolunu göstərir.
Jalə Rövşən