Ölkəyə yeni vaksinlər gətirilir: Pandemiya yenidən qayıdır?
Son günlər havaların soyuması ilə əlaqədar olaraq ölkədə kəskin respirator virus infeksiyalarının, o cümlədən qripin yayılmasında mövsümi artım müşahidə olunur.
Səhiyyə Nazirliyinin məlumatına görə, bu səbəbdən Fransanın “Sanofi Pasteur” şirkətinin istehsalı olan qrip əleyhinə vaksin preparatları ölkəyə gətirilib. Qeyd olunub ki, vaksinasiya tam ödənişsizdir və əhalinin yaşayış və ya iş yeri üzrə ambulator-poliklinik xidmət göstərən dövlət tibb müəssisələrində aparılır.
Məsələ ilə bağlı Azərbaycan Tibb Universitetinin Farmakologiya kafedrasının dosenti Aydın Əliyev TodayPress TV-yə bildirib ki, hazırda müşahidə olunan epidemioloji vəziyyət növbəti pandemiya təhlükəsi kimi qiymətləndirilməməlidir.
"Demək olar ki, bu gün əhalinin sağlamlığında əsas problemlər məhz bu mövsümi xəstəliklərlə bağlıdır. Biz həmişə deyirik ki, hər birimiz sanitariya-gigiyena qaydalarına ciddi şəkildə əməl etməliyik. Havalar soyuyub, insanlar ictimai minik vasitələrindən istifadə edirlər, qapalı məkanlarda olurlar. Belə hallarda maskadan istifadə etmək, boğazı və bədəni soyuqdan qorumaq vacibdir. Yəni insan öz bədənini qorumağı bacarmalıdır".
Onun sözlərinə görə, orqanizmin müdafiə qabiliyyətinin güclənməsi üçün düzgün və balanslı qidalanma xüsusi əhəmiyyət daşıyır:
"Mən demirəm ki, mütləq bahalı qidalar qəbul olunmalıdır. Əksinə, adi sulu yeməklər, müxtəlif göy-göyərtilər, gündəlik istifadə olunan təbii məhsullar daha faydalıdır. Eyni zamanda mayelərdən kifayət qədər istifadə olunmalıdır. Bunlar immun sisteminin normal fəaliyyət göstərməsi üçün vacib amillərdir. Soyuq duş qəbul edə bilməyənlər alternativ üsullardan istifadə edə bilərlər. Əgər kimsə səhərlər soyuq duş qəbul edə bilmirsə, adi dəsmallarla və ya məhrəbalarla bədəni qızarana qədər sürtmək olar. Bu üsul xüsusilə uşaqlar üçün çox faydalıdır. Böyüklər bəzən buna əməl etmirlər, amma uşaqları erkən yaşdan bu vərdişlərə öyrətmək lazımdır. Bu cür yanaşma orqanizmin dözümlülüyünü artırır".
Dosent vurğulayıb ki, sadalanan tədbirlər immun sistemini gücləndirir və xəstəliklərin daha yüngül keçirilməsinə şərait yaradır:
"Biz bu dediyim qaydalara əməl etdikdə bədənin immun sistemi möhkəmlənir. Nəticədə istənilən xəstəliyə qarşı orqanizmin dözümü artır. Hətta insan xəstələnsə belə, bu xəstəlikləri daha yüngül keçirir".
Aydın Əliyev əlavə edib ki, dövlət tərəfindən təmin edilən vaksinlər müvafiq yoxlamalardan keçirilir və təhlükəsizdir:
"Pandemiya məsələsi gündəmə gələndə ilk növbədə vaksinlər yada düşür. Dövlət tərəfindən ölkəyə gətirilən vaksinlər yoxlanılır və onların orqanizm üçün xeyri daha çoxdur. Məhz buna görə də bu vaksinlərdən istifadə etmək məsləhət görülür", - deyə həkim qeyd edib.
Türkan İsgəndərli