Qışda heyvanlara necə qulluq etməli?
Qış mövsümünün yaxınlaşması ilə ev heyvanlarına qulluq xüsusi diqqət tələb edir. Mütəxəssislər bildirirlər ki, xüsusilə kiçik, qısa tüklü, tüksüz, bala və yaşlı itlər soyuğa daha həssas olduğu üçün onlara isti, su keçirməyən və hərəkəti məhdudlaşdırmayan paltar geyindirmək vacibdir.
TodayPress TV xəbər verir ki, gəzinti zamanı heyvanın titrəməsi, pəncələrini yığması və qulaqlarının soyuması hipotermiya riskinə işarə ola bilər və belə halda dərhal evə qayıtmaq tövsiyə olunur.
Gəzintilərin daha isti gündüz saatlarında edilməsi, mümkün olmadıqda isə qısa, lakin aktiv şəkildə təşkil olunması məsləhətdir. Heyvanların qar yeməsinə icazə verilməməlidir, çünki qarın tərkibində zərərli maddələr ola bilər.
Qışda yollara səpilən kimyəvi reagentlər pəncələrdə qıcıqlanma və yanıqlara səbəb ola bilər. Bunun qarşısını almaq üçün xüsusi çəkmələrdən və ya qoruyucu kremlərdən istifadə, gəzintidən sonra pəncələrin ilıq su ilə yuyulması və tam qurudulması vacibdir.
Heyvanın mütəmadi fırçalanması onun isti saxlayan alt tüklərinin daha yaxşı formalaşmasına kömək edir. Lakin tez-tez yumaq dərini zəiflədərək soyuğa qarşı dayanıqlığı azalda bilər. Açıq havada çox olan heyvanlara bir qədər artırılmış kalorili qida faydalı ola bilər, oturaq heyvanlarda isə artıq çəki riskini nəzərə almaq lazımdır.
Türkan İsgəndərli