İspan futbolunun tanınmış siması yaşıl meydanlarla vidalaşır
Sesar Aspilikueta peşəkar futbolçu karyerasını başa vuracağını açıqlayıb.
TodayPress TV xəbər verir ki, hazırda “Sevilya” formasını geyinən 36 yaşlı müdafiəçi mövsümün sonunda futbolla vidalaşacaq.
“Bu gün sizə bildirmək istəyirəm ki, bu mövsüm mənim peşəkar futbolçu kimi son mövsümüm olacaq. Uzun illər arzumu yaşadıqdan sonra həyatımda yeni səhifə açmağın vaxtının çatdığını hiss edirəm.
Düzünü desəm, bu ana hazırlaşsam da, bu mesajı yazmaq mənim üçün çətin oldu. Pampelonada uşaqlıq illərində məktəb yoldaşlarımla futbol oynamağa başlayanda məni necə möhtəşəm yolun gözlədiyini təsəvvür edə bilməzdim. Hər an üçün minnətdaram - qələbələrə, ağır məğlubiyyətlərə, sınaqlara və ən əsası bu yolda qazandığım dostluqlara görə”, - deyə Aspilikueta sosial şəbəkə hesabında yazıb.
Qeyd edək ki, ispaniyalı müdafiəçi futbolçu karyerası ərzində “Osasuna”, “Marsel”, Çelsi”, “Atletiko Madrid” və “Sevilya”nın formasını geyinib, həmçinin İspaniya milli komandasını təmsil edib.
Namiq HUN
