Azərbaycan XTQ NATO standartlarına doğru: ARX-160
İtaliyanın modul tipli hücum tüfəngi olan ARX-160 Azərbaycan xüsusi təyinatlı qüvvələrinin də istifadə etdiyi müasir silahlar sırasındadır.
TodayPress TV məlumat verir ki, bu model “Beretta” şirkətinin “Future Soldier” proqramı çərçivəsində sınaqlardan keçirilərək hazırlanıb.
Tüfəng yüngül, dayanıqlı və geniş modifikasiya imkanları çərçivəsində dizayn edilib. 2008-ci ildən təqdim olunan ARX-160 tüfəngi qısa müddətdə Avropa və Yaxın Şərq ölkələrinin xüsusi təyinatlı bölmələri arasında yayılıb. Bu silah həm nizami ordular, həm də hüquq-mühafizə orqanları tərəfindən geniş istifadə olunur.
Silahın istehsalı “Beretta” şirkətinin yüksək standartları əsasında aparılır. Tüfəngin əsas hissələrinin polimer materiallardan hazırlanması onun həm yüngül, həm də zərbəyə davamlı olmasını təmin edir. Silahın müxtəlif hava və döyüş şəraitində etibarlı işləməsi onu xüsusi əməliyyatlar üçün uyğun edir.
Tüfəngin əsas xüsusiyyətlərindən biri modul quruluşudur. Silaha qaynaqlı nişangah sistemi ilə yanaşı, müxtəlif optik cihazların, lazer göstəricilərinin, gecəgörmə qurğularının və taktiki fənərlərin quraşdırılması mümkündür. Silahın giliz atma pəncərəsi və təhlükəsizlik düyməsi atıcının tələbinə uyğun olaraq dəyişdirilə bilir.
ARX-160 tüfənginin əsas kalibri 5.56×45 mm NATO standartıdır. Bəzi ölkələr üçün 7.62×39 mm olan versiyası da hazırlanır. Silahın təsirli atəş məsafəsi 500–600 metr, atış sürəti isə dəqiqədə 700–900 güllə arasında dəyişir. Qatlanan və uzunluğu tənzimlənən qundağı döyüş şəraitində hərəkət rahatlığı yaradır.
ARX-160-ın digər üstünlüklərindən biri də alov söndürən və səsboğucu qurğularla işləməsidir. Bundan əlavə, tüfəngin lüləsi döyüş şəraitində dəyişdirilə bilir. Sınaqlar zamanı silahın 12 min atəşdən sonra belə mexaniki nasazlıq yaratmadığı qeydə alınıb. Tüfəngin partlamaya davamlı polimer konstruksiyası, həmçinin geniş temperatur diapazonunda etibarlı fəaliyyət göstərir.
Silah -30°C-dən +50°C-yə qədər olan sərt iqlim şəraitində sabit işləyir. Bundan başqa, ARX 160 üçün xüsusi təlim komplekti mövcuddur və bu sistem lazer simulyatoru ilə elektron hədəf mexanizmlərini birləşdirərək real döyüş situasiyalarını imitasiya etməyə imkan verir. Silahın bu xüsusiyyəti xüsusi təyinatlıların döyüş hazırlığında mühüm rol oynayır. Azərbaycan xüsusi təyinatlılarının bu modeli seçməsi də məhz etibarlılıq, ağırlıq balansı, taktiki üstünlüklər və geniş modifikasiya imkanları ilə izah olunur.
Nicat Osman