ABŞ Azərbaycana qayıqlar göndərəcək: Təhlükəsizlik gücləndirilir!
ABŞ-nin Vitse-prezidenti Cey. Di. Vens Azərbaycan Prezidenti İlham Əliyevlə mətbuata birgə bəyanat zamanı bir sıra önəmli məsələlərə toxunub.
O bildirib ki, ABŞ Prezidenti Donald Tramp və Azərbaycan Prezidenti İlham Əliyevin rəhbərliyi altında iki ölkə arasında münasibətlərdə yeni mərhələ başlayır.
Vens, həmçinin qeyd edib ki, ərazi sularının mühafizəsinə dəstək məqsədilə Azərbaycana yeni qayıqlar göndəriləcək.
Bəs bu qayıqlar Azərbaycanın dəniz təhlükəsizliyi imkanlarını konkret olaraq hansı istiqamətlərdə gücləndirəcək?
Məsələ ilə bağlı TodayPress TV-yə danışan hərbi ekspert Ədalət Verdiyev bildirib ki, hazırda Azərbaycanın həm quru, həm də dəniz sərhədləri yaxınlığında müharibələr gedir, münaqişələr davam edir:
“Belə bir vəziyyətdə Azərbaycan həm quru, həm də dəniz sərhədlərinin gücləndirilməsində maraqlıdır. Buna ABŞ tərəfindən də dəstək verilməsi çox vacibdir. Daha əvvəl də ABŞ Azərbaycana dəniz sərhədlərinin təhlükəsizliyini təmin etmək üçün müəyyən dəniz vasitələri təqdim edib. Hətta biz 2018-ci ildə Bakı səmasında ABŞ istehsalı olan çoxməqsədli helikopterləri də görmüşük.
Bu münasibətlər və müxtəlif sülhməramlı funksiyalar Əfqanıstanda da kifayət qədər uğurla davam edib. Sadəcə sabiq Prezident Cozef Bayden administrasiyası Azərbaycan-ABŞ münasibətlərini korlamaq üçün əlindən gələni etdi və Azərbaycanla Ermənistan arasında sülhün əldə olunmasına kifayət qədər mane oldu. Artıq həmin dövr geridə qalıb”.
Ekspert əlavə edib ki, Azərbaycanla ABŞ arasında təhlükəsizlik, dəniz sərhədlərinin qorunması, hərbi-texniki sahədə əməkdaşlıq, hətta minatəmizləmə sahəsində əməkdaşlıq inkişaf etdiriləcək. Onun sözlərinə görə, böyük ehtimalla, ABŞ Azərbaycan ərazilərinin minalardan təmizlənməsi üçün maddi-texniki dəstəyini növbəti aylarda nümayiş etdirəcək.
“Hər bir halda Xəzərdə qaçaqmalçılığın və terrorçuluğun qarşısının alınması üçün ABŞ ilə əməkdaşlıq çox mühüm əhəmiyyət daşıyır. Azərbaycan ərazisinə İrandan və digər ərazilərdən gətirilən narkotik vasitələrin böyük hissəsi Avropa və digər kontinentlərə daşınır. Bu, faktdır. Qarşısının alınması üçün ABŞ-nin dəstək verməsi bəşəriyyətin gələcəyinə xidmət edən addımdır. Xəzərdə narkotik qaçaqmalçılığının qarşısının alınması üçün katerlərin və digər texniki vasitələrin Azərbaycana təqdim olunması bu istiqamətdə daha böyük uğurlar əldə etməyə imkan verəcək”, – deyə Ə.Verdiyev bildirib.
Qiymət Mahir