Müdafiə Nazirliyi və DTX-nın keçmiş rəhbərləri həbs edildi - Gürcüstanda nə baş verir ?

Gürcüstanın Dövlət Təhlükəsizliyi Xidmətində keçirilən brifinqdə ölkənin keçmiş müdafiə naziri Baço Axalayanın saxlanıldığı bildirilib. Qeyd olunub ki, Axalayanın saxlanılması Tbilisidəki 4 oktyabr hadisələri ilə bağlıdır.

Gürcüstanda son zamanlar etirazlar, həbslər artır. Nə baş verir?

Sözügedən prosesləri TodayPress TV-yə şərh edən politoloq Çingiz Şahbazi bildirib ki, Gürcüstanda son dövrlər siyasi vəziyyət xeyli gərginləşib və bu gərginlik artıq açıq qarşıdurma mərhələsinə keçib:

“Hazırda həm etirazçıların, həm də hüquq mühafizə orqanlarının kəskin hərəkətləri müşahidə olunur. Eyni zamanda siyasi fiqurların həbsi prosesi gedir. Keçən ilin sonlarından etibarən hökumətin Avropa İttifaqına üzvlük danışıqlarını dondurması ölkədə kütləvi etirazlara səbəb olub və bu aksiyalar qısa fasilələrlə uzun müddətdir davam edir”.

Ekspert qeyd edib ki, etirazların əsas səbəbi hökumətin yürütdüyü siyasət və son bələdiyyə seçkilərinin nəticələri ilə bağlıdır:

“Etiraz aksiyaları məhz bu amillər fonunda başlayıb. Bələdiyyə seçkilərindən sonra hökumətə qarşı narazılıqlar daha da artdı və oktyabrın 4-də meydanlarda hökumətə qarşı təzyiq mexanizmlərinin tətbiqinə start verildi”.

Ç.Şahbazi bildirib ki, həmin gün etirazçılarla polis arasında toqquşmalar baş verib:

“Hökumət mövcud vəziyyəti yumşaltmaq və dialoq yolu ilə həll etmək əvəzinə, hüquq mühafizə orqanlarına etirazçılara qarşı kəskin hərəkətlər etməyə göstəriş verdi və həbslərə başlanıldı”.

Politoloqun sözlərinə görə, saxlanılanlar arasında ölkənin tanınmış siyasi fiqurları da var:

“Ölkənin sabiq müdafiə naziri Baço Axalaya saxlanılıb. O, 4 oktyabr hadisələrini təşkil etməkdə və dövlət çevrilişinə çağırışda ittiham olunur. Ümumilikdə saxlanılanlar arasında çoxsayda tanınmış siyasətçi var və hökumət onları dövlət çevrilişinə cəhd etməkdə, eləcə də qətliam təşkil etmək kimi ağır cinayətlərdə günahlandırır”.

Ekspert vurğulayıb ki, etirazçıların tələbləri bir neçə əsas istiqaməti əhatə edir:

“Etirazların əsas məğzi Avropa İttifaqına inteqrasiyanın dayandırılması, demokratik institutlara və media müstəqilliyinə qarşı həyata keçirilən addımlara hökumətin son qoyması tələbi ilə bağlıdır”.

Çingiz Şahbazinin fikrincə, Gürcüstandakı mövcud böhran uzun illərdir davam edən proseslərin məntiqi nəticəsidir:

“Ölkədə siyasi dəyişikliklər heç bir halda həzm edilmir və bu da nəticələrin getdikcə daha kritik xarakter almasına gətirib çıxarır. Hökumət və müxalifət arasında dərin uçurum yaranıb, həm siyasi, həm də idarəçilik sistemi ilə bağlı ciddi fikir ayrılıqları mövcuddur”.

Politoloq əlavə edib ki, baş verənlər Gürcüstan üçün ciddi risklər yaradır:

“Hazırda ölkədə sabitliyin pozulmasına səbəb ola biləcək amillər kifayət qədər çoxdur. Bu səbəbdən Avropa İttifaqı da Gürcüstanla bağlı narahatlığını açıq şəkildə bəyan edib”.

Qeyd edək ki, oktyabrın 4-də Gürcüstanda bələdiyyə seçkilərindən sonra keçirilən aksiya prezident sarayı qarşısında iğtişaşlarla davam etdirilib. Etirazçılar prezident iqamətgahına basqına cəhd ediblər.

Qiymət Mahir

TodayPress TV