Kobaxidze: “Repressiyalara yer yoxdur, ancaq zorakılıq edənlər məsuliyyətə cəlb olunmalıdır”

Gürcüstanın Baş naziri İrakli Kobaxidze bəyan edib ki, ölkədə repressiyalara yer yoxdur, lakin son etiraz aksiyaları zamanı baş verən zorakılıq aktlarında iştirak edən şəxslərin cəzasız qalmasının qarşısını almaq məqsədilə hüquq-mühafizə orqanları müəyyən tədbirlər görməyə məcbur olub.

TodayPress TV xəbər verir ki, bu barədə "Sputnik Gürcüstan" məlumat yayıb.

Baş nazirin sözlərinə görə, etirazlar 2024-cü il noyabrın 28-dən etibarən, Gürcüstan hakimiyyətinin Avropa İttifaqına üzvlüklə bağlı danışıqların açılmasını 2028-ci ilə qədər təxirə salmaq qərarına cavab olaraq başlayıb. Aksiyalar zamanı 170-dən çox polis əməkdaşı xəsarət alıb, 32 nəfər isə cinayət məsuliyyətinə cəlb olunub.

“Bu, sadə bir məntiqdir: əgər cinayət cəzasız qalırsa, deməli, təşviq olunur. Buna görə də dövlət daim passiv qala bilməz – törədilən cinayətlərə cavab verilməlidir”, - deyə Kobaxidze vurğulayıb.

Baş nazirin sözlərinə görə, son iğtişaşlar zamanı zorakılıq hərəkətlərində təxminən min nəfər iştirak etsə də, yalnız 30 nəfər saxlanılıb.

Töhfə Səməd